Skessuhorn:

Guðríður í prófkjör Samfylkingarinnar

9. mars 2010

Guðríður Sigurjónsdóttir leikskólakennari gefur kost á sér í prófkjöri Samfylkingarinnar á Akranesi sem fram fer 19. -20. mars næstkomandi. Guðríður er fædd og uppalin á Akranesi, dóttir hjónanna Sigurjóns Hannessonar og Guðlaugar Bergþórsdóttur. Gift Ágústi Grétari Ingimarssyni og saman eiga þau 3 syni, Rúnar Frey 18 ára, Ingimar Elfar 7 ára og Hilmar Veigar 2 ára. Guðríður lauk uppeldisprófi frá Fjölbrautaskóla Vesturlands árið 1996 og námi sem leikskólakennari frá KÍ árið 2000. Guðríður stundar nú Meistaranám í Mennta- og menningarstjórnun við Háskólann á Bifröst.

Guðríður starfar sem leikskólakennari við leikskólann Akrasel en þar hefur hún starfað frá opnun hans. Þar á undan starfaði hún í leikskólanum Garðaseli í 14 ár.  Guðríður hefur komið víða við í félagsmálum og hefur starfað mikið með Skátafélagi Akraness meðal annars sem félagsforingi í 7 ár.

Guðríður býður sig fram því hún telur þörf á nýju og fersku fólki til setu í bæjarstjórn í bland við eldri reynslubolta.  Fólk sem kemur inn af hugsjón og hefur velferð og eflingu sveitafélagsins að leiðarljósi.  Fólk sem hefur fingurna á púlsi samfélagsins, er meðvitað um þarfir bæjarbúa og ekki hvað síst fjölskyldufólks.  Fólks sem er tilbúið til að gera bæinn okkar að enn betri bæ. En til þess að svo megi verða þarf samstæða bæjarstjórn sem setur málefni íbúa og ekki síst barnafjölskyldna í forgang. 

Guðríður hefur ákveðið að bjóða sig fram í prófkjöri Samfylkingarinnar á Akranesi fyrir komandi sveitastjórnarkosningar og gefur kost á sér í 2.-3. sæti listans. 

-fréttatilkynning